અંકલેશ્વરની ગૌતમપાર્ક સોસાયટીના બંધ મકાનમાં રૂ.1.59 લાખની મત્તાની ચોરી કરી તસ્કરો ફરાર
અંકલેશ્વરની ગૌતમ પાર્ક સોસાયટીના એક બંધ મકાનને તસ્કરોએ નિશાન બનાવી રોકડ રકમ અને સોના-ચાંદીના દાગીનાની ચોરી કરી ફરાર થઈ ગયા હતા. બનાવ સંદર્ભે અંકલેશ્વર શહેર એ ડિવિઝન પોલીસે તપાસ હાથ ધરી છે.
અંકલેશ્વરની ગૌતમ પાર્ક સોસાયટીમાં રહેતા નીતિન જયકાંત જાદવ પોતાનું મકાન બંધ કરી પરિવાર સાથે ભરૂચ શહેરમાં કામ અર્થે ગયા હતા. આ સમય દરમ્યાન તસ્કરોએ તેમના બંધ મકાનને નિશાન બનાવી દરવાજાનું તાળું તોડી મકાનમાં પ્રવેશ કર્યો હતો. તસ્કરોએ તિજોરી તોડી તેમાંથી રોકડા રૂપિયા 15 હજાર તેમજ 1 લાખ 44 હજારના સોના-ચાંદીના દાગીના મળી કુલ રૂપિયા 1 લાખ 59 હજારની માલમત્તાની ચોરી કરી ફરાર થઇ ગયા હતાં. આ બનાવમાં મકાન માલિક નીતિન જાદવે અંકલેશ્વર શહેર એ ડિવિઝન પોલીસ મથકમાં ફરિયાદ નોંધાવી હતી, પોલીસે ચોરીનો ગુનો નોંધીને ચોરીનો ભેદ ઉકેલવા ડોગસ્કોર્ડ અને FSLની મદદ મેળવી છે.
બ્યુરો રીપોર્ટ : શાહનવાઝ મસાણી
